GUJARAT BOTAD

ધારાસભ્યશ્રી શંભુપ્રસાદજી ટૂંડિયાના અધ્યક્ષસ્થાને ગઢડા તાલુકાના ટાટમ ગામે વિકસિત ભારત સંકલ્પ યાત્રાના હરખભેર વધામણાં

by Admin on | 2023-12-14 14:19:53

Share: Facebook | Twitter | Whatsapp | Linkedin Visits: 86

---

ધારાસભ્યશ્રીએ પોતે આરોગ્ય કેમ્પમાં બી.પી.-ડાયાબિટીસની તપાસ કરાવી અને મહત્તમ લોકો આ કેમ્પ થકી લાભાન્વિત થાય તે સુનિશ્ચિત કર્યુ

કેન્દ્ર સરકાર અને રાજ્ય સરકારની વિવિધ યોજનાઓને છેવાડાના માનવી સુધી પહોંચાડવા માટે વડાપ્રધાનશ્રી નરેન્દ્રભાઇ મોદીના નેતૃત્વમાં 'વિકસિત ભારત સંકલ્પ યાત્રા'નો પ્રારંભ સમગ્ર રાજ્યમાં કરવામાં આવ્યો હતો. જેને બોટાદ જિલ્લામાં વ્યાપક જનપ્રતિસાદ મળી રહ્યો છે. 

ગઢડા તાલુકાના ટાટમ ગામ ખાતે ધારાસભ્યશ્રી શંભુપ્રસાદજી ટૂંડિયાના અધ્યક્ષસ્થાને વિકસિત ભારત સંકલ્પ યાત્રાના હરખભેર વધામણાં કરવામાં આવ્યા હતા. કાર્યક્રમમાં ધારાસભ્યશ્રીએ ગ્રામજનોને યોજનાકીય માહિતીની જાણકારી રાખવા, યોજનાનો લાભ લેવા તેમજ વંચિત લાભાર્થીઓને જાગૃત કરવા અનુરોધ કર્યો હતો, તથા પ્રધાન મંત્રી વિશ્વકર્મા યોજના વિશે લોકોને સમજાવી મહત્તમ લોકો આ યોજનાનો લાભ મેળવે તેમ ઉમેર્યુ હતુ. 

આ પ્રસંગે મહાનુભાવોના હસ્તે લાભાર્થીઓને સરકારશ્રીની વિવિધ કલ્યાણકારી યોજનાઓની સહાયનું વિતરણ કરવામાં આવ્યું હતું. ઉપરાંત લાભાર્થીઓએ "મેરી કહાની, મેરી જુબાની" થીમ અન્વયે પોતાને મળેલા લાભોની ગાથા વર્ણવી હતી. ગ્રામજનોએ રથના માધ્યમથી વિકાસની ઝાંખી રજૂ કરતી ફિલ્મ નિહાળી હતી. ગ્રામજનોએ વિકસિત ભારતના નિર્માણ માટે પોતાની સહયોગીતા આપવાના શપથ લીધા હતા.

આ તકે ઉપસ્થિત મહેમાનોએ આરોગ્ય અને આંગણવાડી દ્વારા ઉભા કરાયેલા કેમ્પની મુલાકાત લીધી હતી તથા ધારાસભ્યશ્રીએ પોતે પણ આરોગ્ય કેમ્પમાં બી.પી.-ડાયાબિટીસની તપાસ કરાવી અને ટાટમ ગામના મહત્તમ લોકો આ કેમ્પ થકી લાભાન્વિત થાય તે સુનિશ્ચિત કર્યુ હતું. કાર્યક્રમમાં જિલ્લા પંચાયતના પૂર્વ પ્રમુખશ્રી ઘનશ્યામભાઈ વિરાણી, શહેર અગ્રણીશ્રીઓ, ગઢડા તાલુકા વિકાસ અધિકારીશ્રી એ.એ.વાળા સહિત સંબંધિત વિભાગના અધિકારીશ્રીઓ, કર્મચારીઓ,લાભાર્થીઓ સહિત મોટી સંખ્યામાં ગ્રામજનો ઉપસ્થિત રહ્યા હતા.